Патӑрьел районӗн гимнӗ «Патӑрьелӗм, Патӑрьел...» ятлӑ. Сӑввине Александр Мефодьев ҫырнӑ, кӗввине Юрий Кудаков кӗвӗленӗ.

Сӑвви

Турхан та Сӑкӑт, Патӑрьел...
Кунта кӑшт ашӑрах хӗвел,
Вӗреҫҫӗ кӑнтӑр ҫилӗсем,
Пуян чӗреллӗ ҫыннисем.

Хушса юрламалли:
Юхать Пӑла, юхать Хырла
Шӑнкӑртатса, юрла-юрла.
Хура тӑпра, тӳрем уй-хир —
Юхма таврашӗ ку — эпир.

Мухтавлӑ Атӑлҫи Пӑлхар —
Аннемӗр пирӗн. Манар мар.
Тӗп ӗҫӗмӗр — ҫӗрпе вӑрман —
Мӗн авалран алран кайман.

Хушса юрламалли:

Чӑваш пурнать тӗнче пур чух.
Ҫӗр ҫийӗнчен ҫухалмӗ, ҫук.
Кӳршӗмӗрсем — ирҫе, тутар.
Пуласлӑха пӗрлех утар.

Хушса юрламалли: